Իրավապաշտպան Ժաննա Ալեքսանյանը ֆեյսբուքյան իր էջում գրել է.
«ՀՔԾ-ն պարտավոր է լրացուցիչ բացատրություններ տալ երկու տարի առաջ Սարի թաղում ոստիկանական վայրի և բարբարոսական գործողությունների՝ լրագրողների և, խաղաղ բնակչության նկատմամբ բռնի և անմարդկային վերաբերմունքի, ապա դրանց պատասխանատուներին չհայտնաբերելու առնչությամբ։ Քրեական գործի կասեցումը՝ մեղավորներին չհայտնաբերելու պատճառաբանությամբ, ոչ պրոֆեսիոնալ հայտարարություն է։ Դա նույնն է, երբ դեպքերից անմիջապես հետո Սերժ Սարգսյանը կոչ արեց լրագրողներին մոռանալ բռնությունների մասին: Սարի թաղի դեպքերը եղել են միջազգային կազմակերպությունների ուշադրության կենտրոնում, իսկ Human Rights Watch հեղինակավոր իրավապաշտպան կազմակերպությունը մի քանի զեկույց է հրապարակել։ Այնպես որ, գործի կասեցումն ուղղակիորեն խփելու է մեր երկրի միջազգային վարկին»։