armtimes.com-ը գրում է․ Երեւանի 2800-ամյակի այգու բացումից 20 օր էլ չէր անցել, երբ մայիսի 28-ի երեկոյան հայտնի դարձավ, որ կոտրվել է այնտեղ տեղադրված արձանիկներից մեկը՝ «Թղթե նավակով տղան»: Լուրը տարածվեց կայծակնային արագությամբ, որովհետեւ այգին միանգամից էր դարձել երեւանցիների ու մայրաքաղաքի հյուրերի ամենասիրելի վայրերից մեկը:
Երեկ, երբ այցելեցինք այգի, կոտրված արձանն այլեւս այնտեղ չէր: Միայն մի փոքր հետք էր երեւում Հրազդան գետը խորհրդանշող ջրի կողքին, որտեղ էլ, փաստորեն, տղան բաց էր թողնում իր նավակը:
Ու չնայած այդ ջուրն ընդամենը մի քանի սմ բարձրություն ունի՝ երջանկացած երեխաների բազմությունն այնտեղ ինչպես իրական գետն է նետվում, ինչի պայմաններում ցածրադիր արձանիկի վնասվելը թերեւս անխուսափելի էր:
Տարածքում աշխատող հսկիչներն ու ոստիկաններն ասացին, որ այն տեղափոխվել է վերանորոգման: Վստահեցնում էին, թե տեղյակ չեն՝ ինչպես է արձանը կոտրվել: Նրանցից մեկը միայն նշեց, որ լսել է՝ «Նավակով տղան» վնասվել է առանց որեւէ մեկի միջամտության՝ անհասկանալի պատճառով:
Մյուսն էլ զարմացավ արձանի նկատմամբ ցուցաբերվող հետաքրքրությունից. «Բոլորը հարցնում են: Քարի կտոր է, էլի, մարդ է ընկնում, մեռնում, էսքան հետաքրքրվող չի լինում»: Մեր զրուցակիցներից մեկը նկատեց, որ հնարավոր չէ անընդհատ հսկողություն իրականացնել այգու յուրաքանչյուր հատվածում ու ամեն մի շատրվանի կողքին, հակառակ դեպքում դա կլինի ոչ թե հանգստի, այլ կալանքի բացօթյա վայր:
Ասաց նաեւ, որ արձանը կոտրվելու օրը հերթապահած հսկիչների նկատմամբ պատժի միջոցներ չեն կիրառվել: «Էսքան բանը անողը արձանի համար չի պատժի»,- հայտարարեց նա:
Հիշեցնենք, որ Ալեքսանդր Մյասնիկյանի հետնամասում գտնվող այգին վերակառուցել է «Վարդանյան ընտանիք» բարեգործական հիմնադրամը: Այգում տեղադրված ցուցատախտակը նաեւ արձանագրում է, որ 2019 թվականից սկսած 99 տարիների ընթացքում հիմնադրամը նաեւ հոգալու է համայնքային սեփականություն հանդիսացող այս այգու խնամքի ու պահպանության ծախսերը:
«Երեկ երեկոյան՝ մարդաշատ ժամանակ, մի երիտասարդ տղա, այգում վազելիս, ոտքի ուժեղ հարվածով պատահաբար հարվածել է նավակով տղայի արձանի ձեռքին, ինչի արդյունքում արձանի ձեռքը՝ երկաթի զոդման հատվածից պոկվել է: Հավաստիացնում ենք, որ արձանը բրոնզաձույլ է եւ պատրաստված է բրոնզաձույլ արձանների պատրաստման դասական տեխնոլոգիայով՝ կվարցե ավազի օգտագործմամբ:
Արձանն արդեն իսկ հանվել եւ տեղափոխվել է ռեստավրացիայի՝ մասնագետների խմբի կողմից, եւ մայիսի 31-ի առավոտյան այն նորից կտեղադրվի այգու միեւնույն հատվածում: Ռեստավրացիայի ընթացքում զոդումն իրականացվելու է է՛լ ավելի ուժեղ ամրացմամբ, որպեսզի հետագայում անգամ նման շատ ուժեղ հարվածների դեպքում խնդիրը չկրկնվի:
Ամեն դեպքում կոչ ենք անում, որպեսզի այգու այցելուները երեխաների արձանների վրա չբարձրանան. արձանները նախատեսված չեն ոչ հարվածներ ընդունելու եւ ոչ էլ մարդկային ծանր քաշին դիմանալու համար»,- տեղի ունեցածին անդրադարձել է «Վարդանյան ընտանիք» բարեգործական հիմնադրամի տնօրեն Արամ Ղազարյանը՝ տարածված պարզաբանման տեքստում:
«Առիթից օգտվելով՝ ի պատասխան բազմաթիվ հարցումների՝ տեղեկացնում ենք, որ այգին համեմատաբար ոչ այնքան մարդաշատ է լինում առավոտից երեկո ժամանակահատվածում, իսկ երեկոյան ժամերին այգին չափազանց մարդաշատ է, այնքան, որ երեկոներն այգում գրեթե տեղ չկա:
Երեկոյան ժամերին այգու այցելուների մեծ հոսքը դեռ շարունակվում է, եւ մոտակա ամիսներին այցելուների հոսքի թեթեւացում, կարծես թե, չի սպասվում: Եվս մեկ անգամ խնդրում ենք խոտածածկը չտրորել: Այն հատվածներում, որոնց վրայով քայլում են, վնասվում է ոչ միայն խոտածածկն, այլ նաեւ այդ հատվածների ավտոմատ ոռոգման համակարգը»,- ասվում է հայտարարության մեջ:
Դրանում նաեւ նշվում է, որ «Վարդանյան ընտանիք» բարեգործական հիմնադրամի եւ ՀՀ ոստիկանության միջեւ կնքվել է պայմանագիր, ըստ որի՝ այգու շուրջօրյա պահպանությունն իրականացվում է մի քանի ոստիկանների կողմից:
Այսպիսով, կարծես ակնարկ է արվում, որ «Նավակով տղայի» հետ տեղի ունեցածը ոստիկանության աշխատակիցների թերացման հետեւանք է: Երբ ոստիկանության հասարակայնության հետ կապի եւ լրատվության վարչությունից փորձեցինք պարզել, թե քանի ոստիկան է հերթապահություն իրականացնում Երեւանի 2800-ամյակի այգում եւ ինչ է մտնում նրանց գործառույթների հետ, առաջարկեցին հարցումն ուղարկել գրավոր:
Իսկ բանավոր միայն ասացին, որ արձանը վնասվելու վերաբերյալ հաղորդում այս պահի դրությամբ չեն ստացել, բայց չնայած դրան՝ հանգամանքներն ուսումնասիրվում են:
Այգու պահպանության հարցում ոստիկանության թերի աշխատանքի վերաբերյալ ակնարկ այստեղ չեն տեսնում:
