Ալիսա Պանիկյանը համարվում է Կանադայի ամենագեղեցիկ կանանցից մեկը, որը մարդկանց տպավորում է ոչ միայն անթերի արտաքինով, այլև խելքով:
Հայտնի է, որ մոդել- հեռուստահաղորդավարուհին ծնվել է 1985թ.՝ Բուլղարիայի մայրաքաղաք Սոֆիայում: Հինգ տարեկանում աղջիկը ծնողների հետ տեղափոխվել է Կանադա (Տորոնտո):
Ինչպես նշում է rusarminfo.ru կայքը, այնտեղ հայուհին ավարտել է Յորքի համալսարանը, իսկ դրանից հետո ուսումը շարունակել Օնտարիոյի բուհերից մեկում: Արդյունքում Պանիկյանը մասնագիտացել է անգլերենի գծով ու ռադիոլրագրության ոլորտում: Ուսումն ավարտելուց հետո նրան հրավիրել են Կանադայի ամենահայտնի հեռուստաալիքներից մեկում ՝ CTV Two-ում, աշխատելու: Ի դեպ, Պանիկյանը շարունակում է առ այսօր այնտեղ աշխատել:
Հեռուստատեսությունում ունեցած հաջողությունը սկիզբ է դրել նրա մոդելային կարիերային: 2000-ականների սկզբին բարետես հայուհին սկսել է համագործակցել աշխարհում խոշորագույնը համարվող «Icon Models» մոդելային գործակալության հետ:
Արդյունքում երկարոտն գեղեցկուհին քայլել է Լոս Անջելեսի, Միլանի, Նյու Յորքի ու Փարիզի նորաձևության պոդիումներով, մասնակցել ֆոտոնկարահանումների ու գեղեցկության մրցույթների:
2006թ. նա առաջարկ է ստացել Կանադան ներկայացնել «Միսս տիեզերք» («Miss Universe») գեղեցկության մրցույթում: Նշվում է, որ Պանիկյանը հաղթել է «Միսս ֆոտոգենություն» և «Լավագույն լողազգեստ» անվանակարգերում:
Սակայն հետագայում Պանիկյանը հրաժարվել է նմանատիպ մրցույթներին մասնակցությունից: Այսօր մոդելը Avakian ոսկերչական բրենդի գովազդային դեմքն է:
Երեսուներկուամյա հայուհին, որն ունի 183 սմ հասակ, համարվում է «Միսս տիեզերք» մրցույթում Կանադան երբևէ ներկայացրած ամենաբարձրահասակ պրոֆեսիոնալ մոդելը:
