Անկարայի նյարդային սպառնալիքը. Հայաստանը սկսեց «Կոնստանդնուպոլսի վերադարձը».

Թուրքիայի նախագահ Էրդողանի գլխավոր խորհրդական Յալչըն Թոփչուն սարսափելի սպառնալիք է հնչեցրել Ամերիկայի հայկական համագումարի թվիթերյան գրառման կապակցությամբ: ԱՀՀ-ն հրապարակել է Ստամբուլի սուրբ Սոֆիայի տաճարի լուսանկարը՝ հայկական եւ հունական դրոշներով, գրառում անելով, որ Ստամբուլը պետք է դարձնել Կոնստանդնուպոլիս, ինչպիսին որ եղել է որպես Բյուզանդական կայսրության մայրաքաղաք:

Թուրքիայի նախագահ Էրդողանի գլխավոր խորհրդականը հայտարարել է, որ կկտրեն բոլոր նրանց գլուխները, ովքեր կփորձեն անել դա:

Պատկերացնել կարելի է նյարդայնության, գուցե կատաղության աստիճանը, որ միջազգային իրավունքի սուբյեկտ պետության նախագահի գլխավոր խորհրդականն իրեն թույլ է տալիս խոսել «գլուխ կտրելու» սպառնալիքով, որքան էլ Անկարայի համար հանդուգն լինի Ստամբուլի «վերադարձը» Կոնստանդնուպոլսի:
Այդ արձագանքը վկայում է, որ խնդիրը Թուրքիայի ղեկավարության համար չափազանց խորն է եւ ցավոտ, քան պարզապես այսպես ասած թուրքական պետության ինքնիշխանությունը կամ անվտանգությունն այդ բառի ունիվերսալ իմաստով:

Կոնստանդնուպոլիսը «գողոնն» է, որի վրա նստած է ժամանակակից Թուրքիան, եւ Էրդողանն ու թիմը դա պատկերացնում են հիանալի, հասկանալով, որ Թուրքիան հիմք չունի, այն գողոն է, որը հազար տարի անց էլ չի ներդաշնակվելու իր վրա նստած պետականությանն ու գաղափարախոսությանը, եթե անգամ չմնա այդ մասին հիշեցնող մշակութային ու քաղաքակրթական ոչ մի հետք: Միեւնույն է, կմնա հետքը հոգեբանության վրա, որն էլ արտահայտվել է Էրդողանի խորհրդականի սահմռկեցուցիչ արձագանքով՝ «գլուխ կտրել»:

Իր հերթին, այդ նյարդայնությունն ու կատաղությունն ունի թերեւս նաեւ ընթացիկ պատճառ: Բանն այն է, որ սկսված է «Կոնստանդնուպոլսի վերադարձի» միջազգային գործընթաց, եւ այն փաստացի սկսել է Հայաստանը: Հունիսի 4-ին Կիպրոսի մայրաքաղաքում տեղի է ունեցել Հայաստանի, Կիպրոսի եւ Հունաստանի արտգործնախարարների եռակողմ առաջին հանդիպումը: Դրանից առաջ հայկական համայնքի հետ հանդիպմանը Հայաստանի նախարար Զոհրաբ Մնացականյանը հայտարարել էր, որ Կիպրոս է այցելել եռակողմ այդ ձեւաչափի հիմքը դնելու համար:

Հանդիպումից հետո նախարարները հայտարարություն էին արել ձեւաչափի, դրա պատմա-քաղաքակրթական հիմքի եւ միջազգային խաղաղասիրական եւ մարդասիրական նպատակների ու առաքելության մասին:

Եռակողմ ձեւաչափի առաջին Վեհաժողովը՝ պետությունների ղեկավարների հանդիպումը տեղի կունենա Երեւանում՝ 2020 թվականի հունվարին:

Հայաստան-Կիպրոս-Հունաստան եռակողմ ձեւաչափի պատմա-քաղաքակրթական հիմքը բյուզանդական քաղաքակրթությունն է, որի կայսերական մայրաքաղաքն էր Կոնստանդնուպոլիսը, որ այժմ Ստամբուլ է: Բյուզանդական կայսրությունում մի քանի հարյուրամյակ իշխել են հայկական դինաստիաներ, հայկական գործոնը Բյուզանդիայում եղել է պետականաստեղծ:

Գործնականում, Հայաստանի նախաձեռնությամբ եռակողմ ձեւաչափով Նիկոսիան, Աթենքն ու Երեւանը վերագործարկում են աշխարհքաղաքական գործընթացների քաղաքակրթական առանցքային հենման կետերից մեկը, նոր աշխարհակարգի ձեւավորման կամ աշխարհակարգի վերաձեւավորման ներկայիս ժամանակաշրջանում:

Անկարան անշուշտ լավ է պատկերացնում այդ ձեւաչափի խորքային ներուժը կամ այլ կերպ ասած՝ աշխարհքաղաքական պահանջարկվածության ներուժը, ռեգիոնալ բազմաճյուղ վեկտորներով: Խոշոր հաշվով, դա Թուրքիայի տակից գողոնը քաշելու հայտ է, բայց ոչ միայն: Գործնականում, Հայաստան-Կիպրոս-Հունաստան եռակողմ ձեւաչափը լիովին կարող է լինել եվրատլանտյան համակարգի վերակառուցման օրակարգի բազային «ծրագրի» կարգավիճակի հիմնական հավակնորդներից:

ԱՀՀ գրառումը Թուրքիայի համար եղել է արձագանքի առիթ, բայց թերեւս ոչ պատճառ: Պատճառը ձեւաչափն է, որ ստեղծվում է հայկական նախաձեռնությամբ: Իսկ դա ունի առանցքային նշանակություն՝ երբ Հայաստանը ոչ թե միանում է, այլ սկսում: Ոչ այն պատճառով, որ Կիպրոսը կամ Հունաստանն ունեն ավելի նվազ կշիռ կամ արժեք: Պարզապես Հայաստանի վերափոխումն է միջազգային մակարդակով արձանագրվել իբրեւ ֆանտաստիկ, աներեւակայելի օրինակ, կամ այլ կերպ ասած՝ անհնարինը հնարավոր դարձնող մոդել:

Անկարան անշուշտ ունի խորհելու տեղ, թե անհնար թվացող էլ ինչ կարող է հնարավոր դառնալ Հայաստանի վերափոխումով: Բայց, մյուս կողմից, խորհելու փոխարեն ըստ երեւույթին կորցնում է դատողությունը՝ բարձր մակարդակով սպառնալով «կտրել գլուխներ»:

Рейтинг
( Пока оценок нет )
Եթե հավանեցիք այս գրառումը կիսվեք Ձեր ընկերների հետ.
La vie est belle